სიახლეები & ღონისძიებები

მცხეთის რეკრეაციული პარკისა და წნორის მულტიფუნქციური კომპლექსის კომისიის სხდომა

მუნიციპალური განვითარების ფონდის მიერ გამოცხადებულ კონკურსში მცხეთის რეკრეაციული პარკისა და წნორის მულტიფუნქციური კომპლექსის არქიტექტურული კონცეფციები საკონკურსო კომისიამ განიხილა.

კომისიის სხდომას ესწრებოდნენ ინფრასტრუქტურის მინისტრი რევაზ სოხაძე, მინისტრის მოადგილეები ილია ბეგიაშვილი და მზია გიორგობიანი, მუნიციპალური განვითარების ფონდის აღმასრულებელი დირექტორის მოადგილეები, სიღნაღიისა და მცხეთის მუნიციპალიტეტების მერები - მალხაზ ბეგიაშვილი და გოგი აბუაშვილი.

კომისიამ იმსჯელა მცხეთის ახალი რეკრეაციული პარკის არქიტექტურული კონცეფციის ოთხ წინადადებაზე. 60 ჰექტარზე დაგეგმილი პარკის კონცეფციები მოიცავდა მრავალფუნქციურ სივრცეებს, დასასვენებელ და შემეცნებით ზონებს, რომლებიც ქალაქის ისტორიულ გარემოსთან ჰარმონიულ ინტეგრაციასა და მოსახლეობისთვის თანამედროვე რეკრეაციული გარემოს შექმნას ითვალისწინებს.

ასევე განიხილეს წნორის მულტიფუნქციური კომპლექსის შვიდი წინადადება, სადაც წარმოდგენილი იყო სპორტული დარბაზები, საცურაო აუზები, კულტურული ღონისძიებების სივრცეები და შიდა ეზოები - კომპლექსი, რომელიც ერთ სივრცეში აერთიანებს სპორტულ, კულტურულ და საზოგადოებრივ ფუნქციებს.

საკონკურსო კომისია საბოლოო გადაწყვეტილებას რამდენიმე დღეში მიიღებს. გამარჯვებულ არქიტექტურულ ბიუროებთან დეტალური პროექტების მოსამზადებლად გაფორმდება შესაბამისი ხელშეკრულებები.